Adjuntamos el texto del romance escrito y también la grabación sonora realizada por Roberto Serrano.
Engruzia, a dragona d’A Buerda
A sabelo cuántos años
abremos de remontar
ta encomenzar ista istoria
que tos imos a contar.
Yeran tiempos preteritos,
antes de l’onso de Tella:
cuan os dragons decidiban
o que pasaba en a Tierra:
as sequeras, as creixidas,
tierratremos y volcans,
os oracans, as troneras,
y quemisió cuánto más.
Como amuestran os “fosiles”
Sobrarbe yera en o mar,
y as auguas s’en pareixeban
a o Salinar de Naval.
No teneban augua dulza,
y no podeban regar:
yera como un gran pantano,
nomás ta electrizidat.
En a ermita san Visorio,
con intenzión d’aduyar,
os dragons fazioron chunta,
capitulo cheneral,
ta acotraziar os volcans
y fer que puyase o suelo,
y se fesen as montañas,
ixas que agora tenemos.
O fuego d’as suyas fauzes
feba evaporar as auguas,
encomenzando a veyer-se
boiras, nieus y tronadas.
Con ellas, as vals y os ríos,
ibons, basetas y fuens
pa poder regar os uertos
cuan estase menister.
Os mons s’aplenón pa cutio
de vechetazión y “arboles”:
no adubíban a minchar
ni os animals ni os ombres.
Pero i eba una dragona
engruziosa de minchar
que arramblaba con as fauzes
o que es meteba debán:
d’os bosques, toz os “arboles”,
y d’os uertos, as verduras,
que ascape se las minchaba
y non dixaba dinguna.
Toz os vezins de Labuerda,
muertos de fambre y d’espanto
ascape Engruzia la claman,
adhuc que minchaba tanto.
Enuyaus y sin comida
no podeban aguantar,
pos en a glera d’o Cinca,
cundiba poco sembrar.
Dimpués d’ista gran lifara
y a punto ya d’esbotar
le vinió un gran esclafiu
y no paró de femar.
Y ascape se tornó a glera
en un fecundo vergel:
que os moñigos de dragona
con zeniegos van mui bien.
¡Qué contenta se meteba
tota la chen d’o lugar,
cuan minchaban ortalizias
y verduras sin parar!
Y asinas estió que os ruellos
se convirtioron en uertos,
pos as dragonas os feman
muito millor que os corderos.
Fartos, goyosos y rufos,
dimpués de tan gran portento,
fuoron en busca d’Engruzia
ta arixir-le un monimento.
Y qué millor monimento
que meter-la a desfilar
en a Inmemorial Comparsa,
que ye argüello d’o lugar.
Asinas torna, de nuevo,
qui fazió a la glera uerto
ta gran goyo d’os “Gurriones”
pos ye o suyo sustento.
¡Que viva a dragona Engruzia,
a que nos femó a uerta
y la Inmemorial Comparsa
con os mosicos y a fiesta!
¡Vivan ninons y ninonas
vivan os uelos y uelas!
¡Viva goyosa a chen choven
y toz es vezins d’A Buerda!
Regular que con mosica
s’esconchurarán as penas,
plenándose os pedriños
ta pasar-lo de primera.
Romanze en aragonés arreplegato d’os uelos, sobre Engruzia, a dragona, de calendata, asabelo. Publicazions d’a Cofadría de santo Brunofierro, 2024.
Roberto Serrano, experto filólogo aragonés y alcalde de San Juan de Plan.
